کام کی جگہ پر ہراسانی سے بچاؤ‏

تعارف
ایک محفوظ، خوش گوار اور باعزت کام کی جگہ، کارکنان کی تخلیقی اور پیداواری صلاحیت میں اضافے کی ضامن ہے۔ کام کی جگہ کو محفوظ بنانے کے لیے یہ نہایت ضروری ہے کہ ہراسانی اور استحصال جیسے واقعات کا فوری اور عملی تدارک کیا جائے۔ بدقسمتی سے ہراسانی ایک ایسی سماجی برائی ہے جو تیزی سے پھیل رہی ہے اور اس کی کئی صورتیں ہیں جن کی وجہ سے ہراسانی کے واقعات کی تشخیص، ان کی نشاندہی، رپورٹنگ اور ان کا تدارک، سبھی خاصے پیچیدہ مراحل بن جاتے ہیں۔

اس تربیتی پروگرام کے ذریعے آپ جان سکیں گے کہ ہراسانی دراصل ہے کیا اور اس حوالے سے کام کی جگہوں پر صحتمندانہ تبادلہ خیال کیوں ضروری ہے۔ آپ ہراسانی کی مختلف صورتوں کے بارے میں بھی جان پائیں گے اور پاکستان میں ہراسانی کے حوالے سے موجود قوانین کے بارے میں خاطر خواہ معلومات بھی اس ٹریننگ کے ذریعے آپ تک پہنچائی جائیں گی۔ سب سے بڑھ کر یہ کہ اگر کبھی آپ بدقسمتی سے ہراسانی کے کسی واقعے کا شکار بن جائیں، تو اس صورت میں چارہ جوئی کے لیے جو اقدام کیے جانے چاہیئں، اس حوالے سے معلومات بھی اس پروگرام کا حصہ ہیں۔

تربیتی پروگرام کے مقاصد اور نتائج

اس تربیتی پروگرام سے مندرجہ ذیل مطلوبہ نتائج حاصل ہوں گے:

1. دوسرے افراد کی حدود کا احترام کرنا سیکھیں گے۔
2. کام کی جگہ پر ہراسانی اور استحصال کی بنیادی اور ذیلی صورتوں کے بارے میں جان سکیں گے
3. کام کی جگہ پر روا رکھے جانے والے مناسب اور غیر مناسب پیشہ ورانہ طرزِ عمل کے بیچ فرق کر سکیں گے
4. کام کی جگہ پر ہراسانی کے ذہنی اور جسمانی صحت اور استعدادِ کار پر منفی نتائج کے بارے میں جان سکیں گے
5. پاکستان میں کام کی جگہ پر ہونے والے استحصال اور اس کے حوالے سے قانونی چارہ جوئی کے راستوں کے بارے میں معلومات حاصل کر سکیں گے
6. رسمی یا غیر رسمی طور پر ہراسانی کے واقعے کی رپورٹنگ کرنے کے قابل ہوں گے
7. ادارے کے اندر یا ادارے سے باہر ہراسانی کی رپورٹنگ کی صورت میں اہم اور بنیادی طریقہ کار کے بارے میں سمجھ بوجھ پیدا کرسکیں گے